حتى الأدب بقى فيه قلة أدب

من صغرى وانا ببص لمجال الادب على أنه مجال وقور فيه أشخاص محترمة ومثقفة تحب انك تجالسهم وتحاورهم لان كان عندى قناعة ان الاختلاط بيهم هيثقل من موهبة الشخص وهيتثقف منهم لانهم كما كنت اعتقد انهم ناس حكيمة ورزينه عندها علم اقدر استفيد منه ولكن اتصدمت اوى لما اختلطت بيهم وجالستهم لان اكتشفت وقتها ان الصورة اللى كنت راسمها للأدباء اللى من المفترض انهم مثقفين ومحترمين اكتشفت كانت صورة مغايرة تماما للواقع لاقيت ان معيار الاديب عندهم بيتحدد بحاجات غريبة جدا مثلا لقب الاديب مايتقلش إلا على واحد بيشرب سجاير وحاجه صفرا وشعره لازم يكون منكوش ويا سلام بقى لو ماشى وفى ايده دايما كتب لانه بيفتكر ان دة دليل على تثقفه وانه اديب عصره.
دى نوعيه فى بقى نوعيه تانية فاكرين ان بمجرد وجودهم فى اى تجمعات أو ندوات أدبيه يبقى كده هو انسان مثقف لانه دايما موجود وسط الأحداث الثقافيه ومشارك فيها ويتفاخر انه بيقعد فى مكان فى فلان بن فلان قاعد فيه طيب يا صاحبى ليه ماتخليش الناس تتفاخر انهم قاعدين فى مكان أنت قاعد فيه !!!؟
فى بقى نوعيه تالته مقتنعين ان الاديب لازم يكون مصاحب وانه فى اى مكان يروحه لازم تكون جنبه صاحبته اللى قال ايه يستلهم منها افكاره العبقرية واللولبية ويا سلام بقى لو كانت صاحبته دى دلوعه اوى وقتها بقى هيمخمخ ويكتب احلى كتابات فيها عرى وكلام قبيح يتفاخر بيه قدام الناس وهتلاقى 1000 واحد يمجدوا فيه ويقولوا لصحبته عظمه على عظمه يا ست ... ده طبعا على اساس انها كانت مصدر إلهامه وإبداعه
ده غير الأدباء المبجلين اللى بيكتبوا فى كل ما هو شاذ عشان يلفتوا الأنظار ويحققوا مبيعات على حساب تدمير الذوق العام عند القراء وده هو الوظيفة الأساسية للأدب واللى اصبحنا نفتقدها فى ظل أقلام لا تكتب إلا كل ما هو منحط
عاوز أقولكم موقف كدة غريب اعرف صديق لى كان بيهاجم نوعية الأدباء اللى بيكتبوا كتابات شاذه وبيقول عليه ده مش أدب ابدا ففوجئت فى يوم من الأيام بيقولى أنه هينزل كتاب جامد جدا عن الشواذ قلتله ازاى مش انت كنت رافض الفكرة دى وبتهاجم كل اللى بيكتب فى ده !!!؟ قالى لا ما انا قررت انزله عشان اعرفه انه اللى بيكتبه ده حاجات هبله وانا هاوريله الكتابه فى النوع ده اللى على اصولها قولتله انت كدة وقعت فى الفخ يا معلم ولما أكتشفت ان أغلب اللى فى مجال الأدب لا يستحقون الجلوس معهم أبتدعت طريقة حتى لا أخالطهم هذه الطريقة أن اتعامل معهم من فوق حتى لا اتدنى إلى مستواهم ولا أضيع وقتى معهم وأنا بدعو كل صاحب قلم محترم أن ينتهج هذه الطريقة معهم لانهم لا يستحقون ان نعرفهم حتى ولو كانوا معروفين الغريب أنك تلاقى أشخاص بتدافع عن اشباح المثقفين دول كأنهم اصحاب الحق المطلق واى حد يخالف رأيهم يبقى متخلف ورجعي ونسيوا ان من الرجعيه انك تحجر على رأى الآخريين وتناسوا كمان ان الأشخاص اللى بيدافعوا عنهم دول هيجى يوم من الأيام وهيرحلوا وهتبقى الأخلاق والقيم هى المعيار الحقيقي والغير قابل للجدال فيه .
على فكره انا مش بعمم نظرتي دي على كل الناس اللى موجوده فى المجال الأدبي ... لا فى أدباء محترمين ومثقفين موجودين وأنا بعتز بيهم لكن النوعيات اياهم اللى ذكرتهم فانا مضطر فعلا انى مايكونش بينى وبينهم اى تعامل وهاتعامل معاهم من فوق من غير ما أخالطهم خدعوك فأوهموك ان من الأدب والثقافة انك تتكلم بقلة أدب وسفاله وتقول أفكار مخالفه لأخلاقنا وعادتنا ان التدين والاحترام ضد تقدم الأمم والدول انك هتقنع اللي قدامك لما يكون كلامك فيه اهانة لغيرك وشتايم