آل ثقافة آل - الجزء الأول

عاد سمير من عمله وهو يمنى نفسه بما سيأكل
سمير: مساء الفل
منى: مساء الورد
سمير: عاملة إيه
منى: الحمد لله أنا كويسة
سمير: وعاملة إيه؟
منى: الله!.. هو أنت مش لسه سألنى نفس السؤال وجاوبتك كويسة
سمير: يا ستى أنا بسأل أول مرة عن صحتك، والمرة التانية عن الأكل أنت عاملة إيه؟ وبعدين براحة علىّ أنا لسه جاى من الشغل وجعان
منى: هو أنا كلمتك.. وبعدين كتر السلام يقل المعرفة
سمير: طيب أنا كده هفضل أسلم عليكى من هنا لبكرة.
منى: بقى كده.. عايز تقل المعرفة.. ماشى يا سمير.
سمير: باهزر معاكى فيها حاجة دى؟!.. أنت ما بتهزرش يا رمضان.
منى: لا يا حبيبى هزر براحتك.
سمير: طيب يلا أحسن أنا جاى من الشغل مرهق وجعان وعايز أكل.. عاملة إيه؟
منى: ما أنا قولتلك كويسة.
سمير فى غضب: تانى؟ أنا بسأل عن الغدا.. الاكل.. المم.
منى: وأنا كمان باهزر.. أنت ما بتهزرش يا رمضان.
سمير: ماشى ماشى.
منى: أصلى بصراحة ما عملتش أكل النهارده. يزداد سمير غضباً
سمير: ليه بقى ما عملتيش أكل النهارده
منى: أصلى كنت عمالة أقرا الجرايد والمجلات العلمية علشان أتسقف.. مش أنت اللى قولتلى إنك كان نفسك تشوفنى الإنسان المسقفة علشان تفتخر بىّ قدام أصحابك وزوجاتهم.
سمير: أيوه قلت كده، تتثقفى مش ما تعمليش أكل.
منى: أنا عملت بنصيحتك وقعدت أتفرج على برامج الأكل وبرامج تانية كده يعنى.
سمير: استفدتى إيه بقى؟
منى: استفدت حاجات كتيرة، يعنى مثلاً شفت أحدث طرق عمل البامية وإزاى أعمل مكرونة بالصوص و...
سمير مقاطعاً حديثها: إيه اللى بتقوليه ده؟ هى دى بقى الثقافة؟
منى: طبعاً.. أمال أنت فاكر إيه؟
سمير: أبداً.. يا شيخة حرام عليكى، وأنا اللى فاكرك هاتكلمينى عن الدستور ولا حتى عن انتخابات الرئاسة القادمة ولا حتى آخر أخبار البورصة والاقتصاد المصرى.. يعنى حاجة كده.
منى: إيه اللى أنت بتقول عليه ده.. دستور إيه ورئيس قادم إيه؟ لأ وكمان عايزنى أتابع البورصة.. بورصة مين يا عم؟
سمير: أمال تقوليلى طريقة عمل البامية ومكرونة بالسوس.. هى الثقافة.
منى: لأ مكرونة بالصوص.
سمير: يا سلام.
منى: يعنى عايزنى أكلمك عن الصراع اللى فى البلد دلوقتى ما بين الإخوان ونظامه السابق، وبين الشرطة والجيش، ولا أكلمك عن القوانين اللى مش عارفين يحطوها علشان ترضى مين ولا مين، ولا أكلمك عن القوانين اللى عملوها علشان يختاروا مرشحين بعينهم فى انتخابات الرئاسة.. ولا.. ولا.
سمير: الله الله الله.. إيه اللى بتقوليه ده كله؟ كل ده وبتكلمينى عن الأكل وماعرفش إيه.. طب ما أنت عارفة كل حاجة أهه.
منى: امال فاكرنى ماعرفش حاجة، بس أنا ما بتكلمش لأنى باشوفك كل يوم بتهرى وتُنكت فى نفسك وكل يوم عمال تتفرج على القنوات، قناة تقولك الإخوان دول ملايكة، دول أجدع ناس، وبتوع الوطنى اللى مسمينهم «فلول» يبقوا خونة، وتلقى قناة تانية تقولك إن الإخوان دول بتوع مصلحتهم، وبيمشوا بنهج «كل الطرق مباحة للوصول إلى الهدف المنشود»، يعنى لو مصلحتهم مع بتوع الفلول هيعملوا معاهم صفقة زى ما حصل مع النظام السابق فى 2005، وقناة تالتة تقولك دول خونة وقتالين قُتلة، وغيرهم كتير من القنوات.

انتظروا البقية في الجزء الثاني
atef_f20@yahoo.com