مذكرات زوج حشرى وزوجة نكدية

-A A +A

مذكرات زوج حشرى وزوجة نكدية
عيد الحب.. وما أدراك ما عيد الحب

كان سمير فى عمله، فجأة دخل عليه زميله منير..
منير: صباح الخير يا سمير
سمير: صباح الخير يا منير
منير: كل سنة وانت طيب
سمير: وانت بالصحة والسلامة.. بس ده بمناسبة إيه
منير: النهارده عيد الحب
سمير: عيد الحب!
منير: أيوه.. انت مش عايش فى الدنيا ولا إيه
سمير: عايش يا عم بس كنت ناسى
منير: ناسي.. طيب ورينى بقى كنت هتروح إزاى من غير ما تجيب الورد فى إيدك
سمير: يعنى هو لازم ورد؟
منير: آه طبعاً.. هو انت فاكر إيه؟
سمير: لا يا عم لا فاكر ولا ناسى
لم ينتظر سمير أن يذهب للمنزل حتى يقول لزوجته كل عام وأنت بخير، فقام بالاتصال بزوجته
سمير: صباح الخير يا حبيبتى
منى: صباح الورد يا حبيبى
سمير: كل سنة وانت طيبة
منى: وانت طيب يا حبيبي.. بس ليه هو النهارده إيه؟
سمير: النهارده عيد الحب
منى: هو الحب كمان له عيد.. عشنا وشفنا
سمير: يا ستى هى جت على الحب
منى: لا يا خويا، بس أقولك.. أحسن انك اتصلت
سمير: ليه؟
منى: علشان أقولك إنى مش لاقية فراخ فى الجمعية.. ابقى هات معاك من السوق وانت جاى
سمير: فراخ!.. إيه اللى بتتكلمى فيه ده؟ بقى أنا بكلمك عن الحب وعيد الحب تكلمينى عن الفراخ
منى: يا سلام.. هو عيد الحب أهم من الفراخ اللى هناكلها.. ولا لما ترجع من الشغل أبقى اكلك حُب محشى فريك يعنى
سمير: يا شيخة قضيها أى حاجة.. دا المهم الحب فى الزمن المنيل اللى احنا فيه ده
منى: طب قصر وانسى الحب اللى ما جلناش منه غير وجع القلب، وماتنساش الفراخ.. قال حُب قال
سمير: برضه هتقولى فراخ.. يا ستى دا أنا باقولك عيد الحب تقولى فراخ.. وبعدين أنا هاجيبك هدية أحسن من الفراخ اللى من كتر ما باكولها قربت أكاكى
منى: طيب يا سيدى ورينا هاتجيب إيه.. وماتنساش الفراخ.. سلام
عاد سمير من عمله وهو يحمل الورد ويضعه خلف ظهره
سمير: مساء الخير يا حبيبتي.. كل سنة وانت طيبة
منى: أهلا أهلا.. انت جيت يا حبيبى.. وبعدين هى شغلانة.. كل سنة وانت.. هو انت مش قولتها فى التليفون النهاره الصبح
سمير: يا وليه فى واحدة تستقبل جوزها كده برضه؟
منى: اسفة يا حبيبي.. اصلى كنت بتفرج على الفيلم العربى والست قالت لجوزها كده.. معلش ما تزعلش
سمير: وبعدين تعالى هنا.. انت زعلانة انى باقولك كل سنة وانت طيبة؟
منى: أصلك قولتها فى التليفون.. مش لازم تكررها.. وبعدين كتر السلام يقل المعرفة
سمير: بجد؟! طيب كل سنة وانت طيبة من هنا لغاية بكره
منى: يا سلام
سمير: المهم.. أنا جايبك حاجة حلوة قوى بالمناسبة الحلوة زيك دى
منى: أكيد جبت الفراخ
سمير: طول عمرك همك على بطنك.. لأ أنا جبتلك ورد
منى: ياما جاب الغراب لأمه.. يا راجل أقولك جيب فراخ تقوم تجيب ورد.. طيب ورينى كده هتاكل ايه؟ تحب اسلقلك وردتين حُمر يكفوك ويشبعوك
سمير: غراب ايه يا ست انتي.. وإيه الكلام الفارغ بتاعك ده اللى بتقوليه النهارده ده.. وإيه العك ده؟
منى: ما انا لسه قايلالك انى لسه كنت باتفرج على فيلم عربي، وبعدين مقولتليش عايز الورد محمر ولا تحبه نص سوا.. وتحب معاه سلطة ايه: طحينة مثلا
سمير: بتهزري.. بقى انا تاعب نفسى ومشتريك ورد وجايبه وجاى تقولى ايه ومش عارف ايه
منى: يا سلام.. طب ارد اقولك ايه.. يا راجل دا انا بقولك ما فيش اكل.. تقوم تجيب الورد.
سمير: هى الحياة اكل اكل.. ايه رأيك تيجى ناكل برة.
منى: فين يعنى.. عند امك
منى: هى دى العزومة.
سمير: لأ.. بهزر، ايه رأيك نروح كنتاكى مثلا.
منى: ما هو برضه فراخ.
سمير: اه عندك حق.. طيب ايه رأيك ناكل بيتزا
منى: ما انت بتحبها بالفراخ برضه.
سمير: يعنى ايه.. مفيش فايدة، فراخ فراخ فراخ.. طيب انا رايح مشوار وجاى تانى.
منى: رايح فين؟
سمير: رايح أجيب فراخ.
وأثناء ذهابه الى السوبر ماركت لشراء الفراخ يتصل بزميله منير.
سمير: ازيك يا منير، عامل ايه فى عيد الحب
منير: الحمد لله.. جبت للمدام وردتين، واحدة حمرا والتانية بيضا، وهى اتبستط قوى بيهم
سمير: ايوه يا عم.. بس قولي، ليه حمرا وبيضا.
منير: قولتلها الحمرا ده رمز الغيرة، والبيضا علشان قلبها ابيض.
سمير: ايوه يا عم حقك.
منير: وانت عملت ايه مع المدام
سمير: لا انا غيرك خالص.. انا جبتلها بوكيه ورد
منير: حلو قوي.. ده اكيد عمل مفعول السحر.. واكيد جاب معاك نتيجة هايلة.
سمير: طبعا.. والدليل انى رايح اجيب فراخ من السوبر ماركت.
منير: طبعاً علشان تاكلوا فى جو رومانسي، وتلاقيها محضرالك الشمع علشان تتعشوا عليه، ايوه يا سيدى يا بختك.
سمير: فعلا.. هى محضرة.. بس مش الشموع.. محضرة الحلة، تخيل بقولها جايبلك ورد.. تقولى تحب تاكله مسلوق ولا محمر، لأ وكمان بالسلطة ولا من غير.
منير: لا انا مراتى ارحم بكتير، روحت لقيتها محضرة السفرة وعليها شمعتين ومزيكا رومانسية.
سمير: لا انا كانت محضرة موسيقي.. بس موسيقى حسب الله.
منير: وهتعمل ايه دلوقتي. أبداً، هروح اكل برة البيت وابقى اروح اجيبلها فراخ وانا مروح.
منير: طيب ما تيجى يا عم وانا عازمك عندى على الغدا.
سمير: لا يا عم ده جو رومانسى وما احبش اعكر صفوكم فى يوم زى ده
منير: ولا يهمك.. وبعدين المدام سمعانى وما عندهاش مانع.
سمير: ما بلاش.. افتكر انى قولتلك بلاش.
منير: لا يا عم، تعالي.
سمير: ماشى يا عم.
يحضر سمير إلى منزل منير صديقه
سمير: مساء الخير.
منير: مساء النور.
سعاد زوجة منير: مساء الخير يا أستاذ سمير.
سمير: مساء الخير يا مدام، كل عيد حب وانت طيبة.
سعاد: شكرا على زوقك.
يجلس سمير ومنير وسعاد فى الصالون ويدور الحديث بينهم
منير: اخبارك ايه مع المدام يا سمير يا صاحبي.
سمير: ابدا، فى عيد الحب انا فى مكان وهى فى مكان تاني.
سعاد: طيب ما حولتش تقولها نخرج نتفسح ولا حتى نشم شوية هوا بعيد عن البيت.
سمير: حاولت طبعا بس اعمل ايه، مش موافقة، كل اللى عايزاه فراخ وبس.
منير: لا، انت ربنا يكون فى عونك.. انا وسعاد عايشين فى سعادة بعيد عن الاشكال اللى زيك انت ومراتك.
يضحك ثلاثتهم: هههههههههه
سمير بخبث: ألا قولى يا منير.. أخبار الست اللى كنت بتكلمها فى المكتب إمبارح إيه؟ وأخبار الميعاد اللى ادتهولها إيه؟ ولما سألتك هى مين قولتلى المدام، صحيح يا مدام الكلام ده.
سعاد: أبداً أنا متكلمتش معاه فى التليفون إمبارح ولا ادتله ميعاد، ليه هو أنا مراته ولا صحبته.
منير: بتقول ايه يا سمير، بلاش هزار فى يوم زى ده.
سمير: هزار ايه؟ دا انت قولتلى انك مديلها ميعاد بعد الشغل، ما هى المدام اهى بتقول انك ماتكلمتش معاها امبارح يعني، يبقى اكيد الحكاية فيها واحدة ست تانية، والمدام طبعا مش عارفة اى حاجة؟ وانا اقول انت مهتم بعيد الحب معاها قوى النهارده وبتقولى انك هتيجى فى اخر اليوم وتتحجج لها باى شىء، تعالى نروح عند امك وتسيبها وتنزل ولا اى حاجة.
سعاد: ايوه صحيح، احنا اتفقنا اخر اليوم نروح عند والدتي.
منير: بتقول ايه يا سمير، بلاش هزار، وانتى يا ستى ما احنا متكلمين من اسبوع وقولنا هنروح النهاردة.
سعاد: لأ، انا عايزة اعرف مين الست دي.
منير: يا حبيبتى انا بحبك، دا انا جايبلك النهاردة وردتين علشان نحتفل بعيد الحب.
سعاد: حب ايه وعيد ايه، انا عايزة اعرف دلوقتي.
منير: يا حبيبتى ده بيهزر، مش كده برضه يا سمير.
سمير: ايه بتغمزلى علشان اغير الكلام، حاضر انا بهزر يا مدام.
سمير: طب عن إذنكم انا ماشى يا جماعة، أما ألحق أروح.
يتعارك الزوجان، فيترك سمير المنزل ويتوجه الى منزل زوجته
سمير وهو ذاهب الى منزله: قال عيد الحب قال، اشمعنى انا اتنكد وهو ينبسط، يشرب بقي.
يروح سمير إلى منزله وتستقبله زوجته
مني: انت جيت يا سبع البرمبة.
سمير: ايه سبع البرمبة ده، انت مالك يا ست انتي.
ويتعارك الزوجان.
سمير: هو اللى اعمله فى الناس يطلع على ولا ايه؟

atef_f20@yahoo.com